O‘zbekiston tashqi ishlar vaziri Baxtiyor Saidov Belgiyaning mamlakatdagi yangi elchisi Matias Kende hamda Shvetsiyaning yangi elchisi Martin Rozendan ishonch yorliqlarini qabul qildi. Bu haqda vazir o‘zining Telegram-kanalida ma‘lum qildi.
Matias Kende bilan uchrashuvda Toshkentda Belgiya elchixonasi faoliyatining yo‘lga qo‘yilishi ikki davlat munosabatlaridagi muhim voqea ekani qayd etildi.
Tomonlar siyosiy muloqotni yana-da mustahkamlash, savdo-iqtisodiy va investitsiyaviy hamkorlikni kengaytirish masalalarini muhokama qildi.
Shuningdek, ikki tomonlama va Yevropa Ittifoqi doirasida O‘zbekiston−Belgiya aloqalarini rivojlantirishga tayyorlik bildirildi.
Shvetsiyaning yangi elchisi Martin Rozen bilan uchrashuvda esa so‘nggi yillarda O‘zbekiston−Shvetsiya munosabatlari faollashayotgani ta‘kidlandi.
Tomonlar savdo-iqtisodiy va investitsiyaviy hamkorlikni kengaytirish, shuningdek, ikki mamlakat ishbilarmon doiralari o‘rtasidagi to‘g‘ridan-to‘g‘ri aloqalarni rag‘batlantirish muhimligini qayd etdi.
Baxtiyor Saidov elchilarni yangi vazifasi bilan tabriklab, ikki davlat bilan munosabatlarni yana-da rivojlantirishga tayyorligini bildirdi.
